Naxçıvan Muxtar Respublikası Ali Məclisində bədən tərbiyəsi və idmanın hazırkı vəziyyəti və qarşıda duran vəzifələrlə bağlı 18 mart 2013-cü il tarixdə keçirilən müşavirədən sonra muxtar respublikada atıcılıq idman növünün maddi-texniki bazasının formalaşdırılması və möhkəmləndirilməsi istiqamətində görülən mühüm işlərdən biri də atıcılıq üzrə idman klublarının təsis edilməsi olmuşdur.
“Bədən tərbiyəsi və idman haqqında” Azərbaycan Respublikası Qanununa uyğun olaraq Naxçıvan şəhərində yaradılan atıcılıq idman klublarından birinə “Qələbə” adı verilmişdir. Naxçıvan Muxtar Respublikasında atıcılıq üzrə idman növünü inkişaf etdirmək, idmançıların, məşqçilərin, hakimlərin və muxtar respublikada atıcılıq idmanının inkişafında marağı olan yeniyetmə və gənclərin idmanın bu növü ilə məşğul olmalarına şərait yaratmaq məqsədi ilə yaradılan "Qələbə" Atıcılıq Klubu 1 aprel 2013-cü il tarixdə təsis olunmuşdur.
Təsisçilər Naxçıvan Muxtar Respublikasında atıcılıq idman növünün kütləviliyi, inkişafı, yeniyetmə və gənclərin bu idman növünə cəlb edilməsi məqsədilə öz səylərini birləşdirmiş və könüllü olaraq bu idman klubunu yaratmışlar. Klubun statusu, məqsədi, hüquq və vəzifələri, nizamnamə fondu, üzvlərinin hüquq və vəzifələri, idarə olunması qaydaları klubun nizamnaməsində öz əksini tapmışdır.
Muxtar respublikada atıcılıq üzrə idman yarışlarının keçirilməsinə təşəbbüskarlıq göstərilməsini, təşkil olunan atıcılıq üzrə idman yarışlarında klub üzvlərinin iştirakının təmin olunmasını, müvafiq yarışlarda yüksək nəticələr göstərən klub üzvlərinin fəaliyyətlərinin stimullaşdırılmasını, atıcılıq idman növünə həvəs göstərənlərə (yerli və xarici vətəndaşlara) ödənişli əsaslarla fərdi və qrupvari məşqlərin təşkil olunmasını təmin edən klub atıcılıq üzrə yüksək səviyyəli idmançılar hazırlamaq, mütəxəssislərin ixtisaslarını artırmaq, atıcılıq üzrə muxtar respublikanın yığma komandasına cəlb edilmiş klub üzvlərinin müvafiq çempionatlarda, həmçinin beynəlxalq yarışlarda müvəffəqiyyətlə çıxış etməsi üçün şərait yaratmaq kimi məsələləri də özünün əsas fəaliyyət istiqaməti kimi müəyyənləşdirmişdir.
